ورا ما تروح تنوم ..؟

بسم الله الرحمن الرحيم
.
.
.

صبحكم الله بالخير ..

ودي اكلم نفسي اليوم بصوت عالي

اذا تبون تسمعون تفضلوا

واذا اخباري ما تهمكم

أيضا تفضلوا


المهم ..

امس بعد ما تسحرت ورحت للمسج وصليت الفجر

قلت اجلس في المسجد الين تطلع الشمس ثم اصلي ركعتي الضحى

واكسب أجر عمرة وحجة مع النبي عليه السلام

كما في الحديث
.
.

وبعد ما قريت صفحتين جاني بليس وقعد يذكرني اني ما معي مفتاح

واني ما راح القى احد يفتح لي الباب لو تأخرت

والله صدق لو ما القى احد يفتح لي الباب ابتورط

وابنرك في الشمس ويمكن اروح انوم في المسجد

يشين التشرد !!

على طول سكرت المصحف ورجعت للبيت قبل ما يرقون الاهل ويتركوني عند الباب

يشين اللي يرن الجرس ولا يفتحون له ..


.
.


مرة كنا مخيمين انا والاهل وكان الجو بارد جدا جدا جدا

وفي اليوم الثالث قلت ابرجع انوم في البيت

وكان المخيم بعيد جدا

تخيلوا يوم وصلت البيت وش كنت ناسي

السيارة

لا .. ما كنت ناسي السيارة لاني رجعت بها

كنت ناسي مفاتيح البيت !!

والمشكلة وانا راجع اتصلت على واحد وعزمته

وكل شوي يتصل علي يقول وينك أنا عند بابكم !!

وصلت البيت ودخلت السيارة

يوم جيت ابقتح الباب الداخلي ما لقيت المفتاح

يا ساتر .. المفتاح في المخيم ..

قلت لصاحبي عطني مفاتيحك

قال لا تكون ناسي المفتاح

قلت ... تقريبا

قال ما فيه امل تفتح بمفتاحي

قلت يا ولد وش يدريك خلنا نجرب

ضحك وطلع لي ميداليه فيها سبعة مفاتيح

اخذتها ودخلت اول مفتاح في الرتاج

( تقدر يا السبيكة تقول رتاج )

المهم دخلت اول مفتاح في الباب وكانت المفاجأة

وش تتوقعون المفاجأة ..
.
.

الباب انفتح

والا ما انفتح

.
.
.

المفاجأة ان الباب انفتح

قلت الله اكبر ...

دخلت البيت وناظرت الجدران وشميت بيتنا شمه قوية

كدت ان استنشق الصالة بكبرها من الفرحة

ما لكم في طول الحكي ..

رجعت لصاحبي وقلت :

سبحان الله ..

انت مرسلك الله عشان تفتح لي الباب



.
.
.

وش كنت اقول في البداية

صح تذكرت

.
.
.

رجعني ابليس بأفكاره المسمومة وخرب علي الجلسه في المسجد وقراية القرآن

وضاع علي فضل كثير ...

رجعت وبعد ما دخلت البيت شفت الكمبيوتر

قلت يولد خلني ادخل على منتدى الشلة

واشوف وش صار على موضوعي

هل من جديد

منهو رد ومنهو ما رد (( يا شين هالتفكير ))

يخليك بجد تتعلق في النت

المفروض ان الواحد اذا كتب موضوع يكسر الكمبيوتر

عشان ما يقعد كل شوي ينط على النت

من جد تفكير سطحي

.
.
.

المهم نمت الصباح مثل هالحزة تقريبا

وقمت اصلي الظهر

والله ما احس اني نمت خمس ساعات

كأني غمضت وفتحت

راسي مليان فضاوة

كل ما رفعته نادته الوسادة ودبج عليها

المشكلة ان الشياطين مربطة

بس الظاهر انهم شاحنينا من قبل رمضان

وما بعد فضت بطارية ( ابليس اللي فينا )

.
.
.

ابقول >>( الموهيم )

بس لا احد يقراها الا السبيكة

لانه يحب هالحركات اللي فيها ميال ...


.
.

الموهيم

.
.
.



ليش تقرونها

ابكتبها الحين ولا احد يقراها الا السبيكة



.
.
.

الموهيم



.
.
.



الموهيم

وش كنا نقول

ايه بعد ما صليت قعدت اتسدح الين نمت بصعوبة

ونودي لصلاة العصر

انا ودي اقوم بسرعه عشان اصير من اللي يسارعون في الخيرات

بس بقايا ضعف الايمان يعيي علي

قمت ولله الحمد وهالمرة اسرع من الظهر

لكني ما قمت بسرعه

انتم تتأخرون

.
.
.
.


الله المستعان

بعد العصر رحت شريت سمبوسه

وموزريلا وشي ثالث ما اذكر وشو الحين

ايه .. تذكرت .. توست

.
.
.
.

يوم جا المغرب كلناها
.
.
.

بس قبل المغرب صارت قصة محزنه

لاني كنت عازم لي رجال

وكنت مستعجل على الاشياء

وتعرفون الرجاجيل اذا استثقل دمهم ..

يقعدون يقولون ليه وليه

ليه تأخرتوا وبسرعه ... الخ .

طبعا اهل البيت يشتغلون ويتعبون وبدال ما نقول شكرا

نقول ليه تأخرت القهوة .. ليه تأخرت الموية !!

اف .. من هالاخلاق

يا لله انك تحسن اخلاقنا كما حسنت خلقنا

المهم ..

جا الرجال الطيب ورحبت فيه اشد الترحيب

وسألته عن احواله وعياله وسألته سؤال ما تتخيلونه

اتحداكم تدرون وش سألته عنه

.
.
.

الليه يعرف وش السؤال ابشتريله حبوب كيرم

بس بشرط الخمسين لي ..


.
.
.

سألته عن الشيخ ابن جبرين !!

لانه من طلبة الشيخ ابن جبرين

وعيال هالرجال بعد من طلبة الشيخ ابن جبرين

وصاحبي هذا شايب ولا يزال يطلب العلم على كبار العلماء

سألته عن الشيخ

قال الشيخ متفرغ في رمضان للقرآن فقط

يقول : يجلس يقرأ القرآن من حفظه حتى ينام

وأول ما يقوم من النوم يكمل القراية من عند الآية التي وقف عندها !!

سألته كيف جدول الشيخ قبل رمضان :

قال .. كان يلقي دروس يتنقل من مدينة إلى مدينة لا يستقر ولا يعرف الراحة

حتى تعب وأدخل المستشفى قبل رمضان

سأله اخوي كم عمره

قال عمره تسعه وسبعين سنه

قال اخوي عمره .. ثمانين سنة وكل هذا يسويه

قال .. يتعب الطلاب الشباب وهو ما تعب

قال ..

الفجر يلقي دروس في التفسير والحديث والعقيدة ةغيرعل

ويلقي تقريبا الدروس حتى ينتهي الطلاب ..

قلت ولو بقي عنده طالب واحد ..

قال يجلس يشرح له حتى ينصرف !!

قلت وإذا راح لبيته ماذا وشلون جدوله

قال الظهر يرد على الهاتف ويجيب المستفتين ويقرأ في الكتب

ويجيز بعض الكتب اللي تقدم له ويكتب لها تقديم ..

والعصر يجلس في بيته يستقبل الناس والمستفتين ويرد على التلفون

والمغرب في المسجد للدرس وبعد العشاء للدرس حتى العاشرة او الحادية عشر

قال وقبل أذان الفجر يخرج إلى المسجد وهذا دليل على أنه كان يتهجد

.
.
.

قلت في نفسي متى ينام

واذا نام ما تناديه الوساده مثلي !!


لا .. هذا اذا نام ناداه القرآن

ناداه المسجد

ناداه حب الله

وحب المسلمين

.
.
.


الله المستعان
.
.

قال ومع كل هذا يقع الناس في عرضه والله ما عرفوا الشيخ

ولكن إما لجهلهم أو لحسدهم .. قلت وأيضا تنقل عنه فتاوى مكذوبة عليه

وتشوه صورته ...

قال اخي كذبوا على الرسول ومن باب اولى انهم يكذبون على العلماء

قال صاحبنا .. كذبوا على الله فما بالكم بالكذب على البشر

.
.


.
.
.
.
رجعنا بعد صلاة المغرب للبيت

وبالعافية اقنعته انه يتعشى معي

وقال انا ما اتعشى الا بعد التراويح عشان ما اتعب في الصلاة

جاملني واكل لقمتين واستأذن
.
.
.
.

رحت اصلي العشا مع امام قرايته هادية وراكدة وخاشعة

وبعدين رحت اخلص بعض اشغالي

وبعد صلاة القيام رجعت للبيت

وكنت مليان جوع

ظفيت اللي قدرني الله عليه

ونزلت امي الله يطول بعمرها على طاعته

ونادتني للسحور

تسحرت وما شربت لبن

ورحت اصلي الفجر

وابشركم جلست في المسجد الين طلعت الشمس

وصليت ركعتين الضحى وجيت للبيت

ولا صار فيه اي مشكلة

بالعكس ..

دخلت البيت معزز مكرم

بعد ان قدمت شيئا اسأل الله أن يتقبله ويجعله لي ذخرا يوم القيامه

والله يستر علينا وعلى المسلمين .


والحمد لله ..


.